- શકુંતલા વિજયકુમાર મહેતા

વૃદ્ધો અને નવયુવાનો જાગો ! ઊઠો ખેતર ખેડીને બીજ વાવવાનો અવસર આવી ગયો છે. ચોમાસું કલ્પ શરૂ થઈ ગયું છે. મનુષ્યભવના માનવીને પમાડવા માટે, બીજનું રોપણ કરવા માટે ગુરુદેવો પધારી ગયા છે. વીતી ગયેલા સમયની સામું જોવાનું નથી, સમયની મર્યાદા કોઈની પ્રતીક્ષા કરતી નથી, પર્યાયોના પરિવર્તનને આપણે રોકી શકતા નથી, આપણે સૌ ઉચ્ચકોટિના માનવો છીએ, આપણા માટે મુક્તિ ઘણી જ સુલભ છે. છતાં પંચમ્ કાળમાં જન્મ પામનાર માટે મુક્તિ- મોક્ષ દુર્લભ છે. તેના માટે ઉત્તમ સાધનો જોઈએ જે આપણી પાસે આ કાળમાં અત્યારે નથી. તો શું કરવું? રોદણાં રોવાની જરૂર નથી. ઊઠો ઊભા થાવ. આપણી પાસે નવકારમંત્રનાં પાંચે પદોનાં સાધનાનાં ઉત્કૃષ્ટ સોપાન છે. જેનાથી ઉત્કૃષ્ટ પુણ્ય બાંધી નજીકના જ ભવમાં તરી જઈશું, તીર્થંકર પ્રભુએ બતાવેલા આ પંચ પરમેષ્ટિ પદોનું ગુરુદેવની આજ્ઞામાં રહીને આરાધના કરશું તો જરૂર બેડો પાર થઈ જશે, અને માનવભવ ફળદાયી નીવડશે, સાધના કરવાનાં પાંચ સોપાન : પ્રથમ સોપાન – સિદ્ધત્વ, બીજું સોપાન- વીતરાગ અરિહંતપણું, ત્રીજું સોપાન- આચાર સાધના, ચોથું સોપાન- જ્ઞાન સાધનનો ખજાનો અને પાંચમું સોપાન છે આપણા ગુરુદેવો.